Зибаш ӘЛИ
Өткен аптада жұма түнінен сенбі күніне қараған таңғы сәрі уақытта «Бегім ана 13» үйдің 53 пәтерінде болған өрт оқиғасы сол маңдағы тұрғындардың зәре құтын қашырды. Тілсіз жауды дер кезінде ауыздықтаған өрт сөндірушілердің қырағылығының арқасында адам шығыны жоқ. Десе де тұрғындардың әліде дабыры басылар емес. Себебі бұл көпқабатты тұрғын үйде уақытқа берілетін пәтерлер бар. Жиі-жиі шағымды жасайтын көршілерлер бей мезгілсіз уақытта жалдамалы пәтерге келіп әлдекімдердің түнеп, соңы айқау шумен бітетін оқиғаларынан мезі болған. Тіпті кешкі уақыттарда балаларын өз үйлерінде жалғыз қалдыруға алаңдайды. Осы ретте Қызылорда қалалық Төтенше жағдайлар басқармасының бастығы Жасұлан Түйменовтен үстіміздегі жылы қалада орын алған өрт оқиғаларына байланысты сұрақтарымызға жауап алып, сұқбаттасқан болатынбыз.
-2022 жылдың ішінде қала бойынша қанша өрт оқиғасы тіркелді? Себеп – салдары анықталдыма?
-2022 жылдың 12 айында жүргізілген профилактикалық жұмыстарға қарамастан қала көлемінде 190 өрт оқиғасы орын алса, (2021 жылы 188 өрт) + 1,1%), материалдық шығын 46 млн. 434 мың теңге .Талдау негізінде 190 өрттің басым көпшілігі тұрғын үй секторында орын алған, атап айтқанда 116 өрт, материалдық шығын 37 млн. 719 мың теңгені құрайды. Ал автокөліктерде – 50 өрт оқиғасы орын алып, келтірілген шығын 6 млн. теңге .Объектілерде 17 өрт оқиғасы тіркелді, шығын көлемі 2 млн. 625 мың теңге. Дала және орман өрті бойынша 1 өрт оқиғасы тіркелді, шығын жоқ. Көмірқышқыл газынан және табиғи газдан улану бойынша зардап шеккендер мен қаза болғандар жоқ.
-Тілсіз жаудан қанша адам зардап шекті? Жас айырмашылықтары қандай? Қайтыс болған адамдар барма?
– 2022 жылы 4 адам қаза болса, (2021 жылы – 7, ішінде 3 бала – 42,9 %), жарақат алған адамдар бар. (2021 жылы – 11 адам, 81,8 %). Азаматтардың қаза болуының басты себептері олар қарапайым қауіпсіздік ережелерінің талаптарын сақтамауы салдарынан осындай қайғылы жағдайлар орын алып отыр. Осы ретте қала тұрғындарынан өрт және газ баллон пайдалану ережелерін қатаң сақтауды сұраймыз.Сонымен қатар, Қызылорда қаласы және оған қарасты кент және ауылдық округ тұрғындарына өнеркәсіптік қауіпсіздік департаменті қызметкерлерімен бірлесіп профилактикалық түсіндірме жұмыстарымен қатар ескертпе жадынамалар таратылады.
-Өрт оқиғаларының алдын алу жөнінде қандай жұмыстар жүргізілуде?
–Жылу беру маусымында өрт оқиғаларының алдын алу бойынша басқарма және өртке қарсы қызметкерлерімен тұрғындарға өрт қауіпсіздігін үгіттеу-түсіндіру жұмыстары жүргізу барысында 20720 тұрғын үй араланып, 89956 адам қамтылды. Сонымен қатар қала аумағындағы елді мекендерде тұратын әлеуметтік жағдайы төмен және көпбалалы және тұрмысы төмен 469 отбасының тұрғын үйлеріне көмірқышқыл газынан уланудың алдын алуға арналған «Газосигнализатор» құрылғысы орнатылды.
Білім беру, денсаулық сақтау және басқа да мемлекеттік мекемелерге «Өрт қауіпсіздігінің алдын алу» тақырыбында 55 сабақ өткізіліп 1490 адам қамтылды. Сонымен қатар, 5-11 сынып оқушылары арасында №1 МӨСБ ғимаратына 7 мәрте экскурсия жасалынды. Жергілікті атқарушы орган қызметкерлері және жергілікті полиция қызметкерлері жұмылдырылып, өрт қауіпсіздігі саласы бойынша қауіпті тәуекел тобына жататын (жалғыз басты қарттар мен мүгедек жандар, тұрмысы төмен отбасылар, әлеуметтік бейімделеген азаматтар) азаматтардың мекен-жайы бойынша бірлескен рейдтер ұйымдастырылып, аталған топ мүшелеріне арнайы көңіл бөлінуде.
– Жаздың айы басталды дегенше адамдардың суға түсу мезгілінде қауіпсіздік ережелерінің сақталмауы салдарынан қайғылы оқиғалар орын алып жатады. Өткен 2022 жылы қанша адам суға кетіп ажал құшты, оның ішінде жасөспірім бала барма?
–Азаматтардың қауіпсіздігін қамтамасыз ету Қызылорда қаласы Төтенше жағдайлар басқармасының негізгі бағытының бірі болып табылады.Өздеріңізге белгілі, жыл сайын мамыр және маусым айларында суға түсу маусымы басталып, су айдындарында азаматтардың қаза болу деректерінің көбейетіні мәлім. 2022 жылы су айдындарында Қызылорда қаласы ТЖБ қызметкерлері мен құтқару бөлімшелерінің құтқарушылары су айдындарында күнделікті рейд жұмыстарын жүргізу барысында 3485 қала тұрғынын қамтып, 4525- ден астам дана үн парақ таратылды. Алайда соған қарамастан қала аумағында жазғы суға шомылу маусымы кезінде 9 адам қаза болды, оның ішінде 4 бала. 2021 жылғы осы мерзіммен салыстырғанда – 25 % (2021ж.– 12 адам қаза болды).
Айта кету керек жергілікті полиция қызметімен бірлесіп 88 рет рейд ұйымдастырылып, 27 жеке тұлғаға (азаматтарға) ҚР ӘҚБтК 364 бабы бойынша (Тыйым салынған жерге шомылғаны үшін) «ескерту» тәртіптік шара көрілді. Су айдындарының рұқсат етілмеген қауіпті аймақтарына құзырлы органдармен бірігіп 60 дана (2021 жылы 27 тақтайша) «суға шомылуға тыйым салынады» деген ескертпе тақтайша орнатылып, қаланың басты көшелеріне жалпы саны 4 дана (2021 жылы 1 дана) көрнекті бильборд ілінді. Биылғы жылы да су айдындарында азаматтардың қауіпсізідігін қамтамасыз ету мақсатында суға түсуге болмайтын рұқсат етілмеген қауіпті аймақтарға ескертпе мақсатында тақтайшалар ілінеді, бильборд орнатылды. БАҚ арқылы қала тұрғындарына кеңінен түсіндірме жұмыстары жүргізіліп, қалалық білім бөлімімен бірлесе мектеп оқушылары мен олардың ата – аналарына ЗУМ платформасы арқылы офлайн және онлайн сабақтар өткізілетін болады.
-Суға түсуге тиым салынған аймақтар деп қай жерлерді атауға болады?
–Қала көлемінде суда орын алған қайғылы жағдайларға жасалған талдау көрсеткендей, негізгі себептер судағы қауіпсіздік ережелерінің өрескел бұзылуы және су айдындарының жабдықталмаған жерлерінде суға түсуі екені байқалады.Сондай-ақ, жыл сайын суға шомылу маусымы басталғаннан бастап көптеген оқу орындарының жастары табиғатқа шығу демалыстарын өзен мен көлдердің кез келген жағасында ұйымдастыруы жиі орын алуда. Осыған байланысты қала тұрғындарының қайғылы жағдайларға ұшырамауын болдырмау, алдын алу және суға шомылу маусымында су айдындарында азаматтардың қауіпсіздігін қамтамасыз ету мақсатында Қызылорда қаласының Төтенше жағдайлар басқармасы Қызылорда қаласы әкімдігімен бірлесіп қала тұрғындары мен қонақтарының қауіпсіздігі үшін суға түсуге болмайтын және қауіпті аймақ ретінде саналатын жерлерге және орталық көшелерге оның ішінде («Рисмаш» қыстағы және «КОПЭС» саяжайы)аумағындағы Сырдария өзені және Сталинскі каналдарына «Суға түсуге тыйым салынады» деген ескертпе тақтайшалар мен билбордтар сырдария өзені аумағындағы қауіпті аймақтармен қала орталығына орнатылды.
–Суға кету өрт оқиғаларынан бөлек маусым айларында балалардың терезеден құлауы жиі орын алып жатады. Осы ретте қанша оқиға тіркелді?
–Терезеден құлау оқиғалары бойынша Қызылорда қаласында жыл басынан бастап 9 бала, оның ішінде 1 қаза болып – 10% (2021 жылы 10 жасөспірім оның ішінде 2 бала қаза болды) балалардың терезеден құлау дерегі бойынша зардап шеккендердің негізгі бөлігі 1 мен 6 жас аралығындағы балалар. Статистикалық мәліметтерге сүйенсек қайғылы жағдайдың басты себебі – балалардың ата-анасының қарауынсыз қалуынан, қорғағыш торлардың нашар бекітілуінен және де балалардың терезе алдында ойнауынан орын алған.
-Сұқбатыңызға рақмет!
П/С: Ажал айтып келмесе де алдын алып, сақтық шараларын қатаң сақтау әрбір адамның қауіпсіздігі үшін жасалынатын бірінші қадам. Орын алып жатқан өрт оқиғалары, суға кету деректері, балалардың терезеден абайсызда құлап кетуі бәрі-бәрі сақтық шараларды сақтамағандықтан, салғырттықтан. Адамның қауіпсіздігі бәрінен қымбат.