Сырдария ауданындағы №210 О. Әбілпаттаев атындағы орта мектепте «Әділетті және прогрессивті Қазақстанның Халықтық Конституциясы үшін!» аумақтық коалициясы мүшелерінің қатысуымен білім саласы өкілдерімен кездесу өтті.
Іс-шара барысында коалиция мүшелері Марат Бакуов, Ақтөре Ибрагимұлы, Жадыра Бағдатқызы және Аружан Мұханбетқали жаңа Конституция жобасына енгізілген өзгерістер мен оның негізгі бағыттары туралы ақпарат берді.
Кездесуде референдум өткізу тәртібі, азаматтардың құқықтық сауаттылығы мен қоғамдық үдерістерге қатысу мәселелері сөз болды. Қатысушылар құжаттың мазмұнына қатысты бірқатар түсіндірмелер алды.
Аумақтық коалиция мүшесі Марат Бакуов өз сөзінде Конституция жобасында білім, ғылым және инновация салалары ұзақ мерзімді стратегиялық бағыттардың бірі ретінде қарастырылғанын атап өтті. Сондай-ақ адами капитал ұғымына ерекше мән берілгенін жеткізді.
Жадыра Бағдатқызы білім мен ғылымның ел дамуына ықпалына тоқталып, құжатта осы салаларды қолдауға қатысты нормалар қамтылғанын айтты.
Кездесу барысында қатысушылар пікір алмасып, сұрақтарына жауап алды.