Еліміздің қорғаныс қабілетін нығайту, Қарулы Күштер қатарын жас сарбаздармен толықтыру – мемлекет қауіпсіздігін қамтамасыз етудегі маңызды міндеттердің бірі. Осы бағытта Қызылорда қаласында 2026 жылғы күзгі мерзімді әскери қызметке шақыру науқаны басталды.
Әскер – азаматтың жігерін шыңдап, жауапкершілігін арттыратын, тәртіп пен төзімділікке тәрбиелейтін үлкен өмір мектебі. Бүгінде Отан алдындағы борышын өтеуге аттанған жастарға мемлекет тарапынан түрлі әлеуметтік қолдаулар көрсетіліп, әскери қызметтің беделін арттыру бағытында жүйелі жұмыстар жүргізілуде.
Осыған орай күзгі әскерге шақыру науқанының барысы, шақырылушыларға қойылатын талаптар мен әскери қызметтің артықшылықтары туралы Қызылорда қаласының қорғаныс істері жөніндегі басқармасының әскери қызметті насихаттау, тәрбие және идеологиялық жұмыстар жөніндегі инспекторы А. Бердибаевамен сұхбаттасқан едік.
– Қазіргі таңда Қызылорда қаласында күзгі әскерге шақыру науқаны басталды. Науқанның басты мақсаты қандай?
– Иә, еліміз бойынша 2026 жылғы күзгі мерзімді әскери қызметке шақыру науқаны өз жұмысын бастады. Бұл – Қазақстан Республикасы Президентінің Жарлығына сәйкес жүзеге асырылып жатқан маңызды мемлекеттік шаралардың бірі. Негізгі мақсат – Қазақстан Республикасының Қарулы Күштері мен басқа да әскери құралымдарының қатарын толықтыру, мемлекетіміздің қорғаныс қабілетін нығайту. Әскерге шақыру – тек азаматтарды әскери қызметке қабылдау ғана емес, жастарды отансүйгіштікке тәрбиелеу, олардың бойындағы жауапкершілік пен азаматтық парызын қалыптастыру бағытындағы маңызды жұмыс.
– Әскерге кімдер шақырылады?
– Қолданыстағы заңнамаға сәйкес, әскери қызметке шақырудан босатуға немесе оны кейінге қалдыруға заңды негіздері жоқ, 18 бен 27 жас аралығындағы ер азаматтар мерзімді әскери қызметке шақырылады.
Әрбір шақырылушы міндетті түрде арнайы құрылған комиссиядан өтеді. Медициналық тексеру барысында олардың денсаулық жағдайы жан-жақты қаралады. Сонымен қатар психологиялық дайындығы да ескеріледі. Яғни, жас азаматтардың әскери қызметке жарамдылығы белгіленген талаптарға сай анықталады.
– Кейбір жастар әскерге баруды тек міндет ретінде қабылдайды. Әскери қызметтің берер тәрбиелік маңызы қандай?
– Әскери қызмет – әрбір азаматтың өміріндегі үлкен мектеп деп айтуға болады. Әскерге барған жас тәртіпке үйренеді, уақытты тиімді пайдалануды меңгереді, жауапкершілікті сезінеді. Сонымен қатар физикалық тұрғыдан шыңдалып, түрлі әскери машықтарды игереді.
Ең бастысы – әскери орта жастардың бойындағы отансүйгіштік сезімді күшейтеді. Бірлікке, достыққа, төзімділікке тәрбиелейді. Сондықтан әскери қызметті тек заң алдындағы міндет деп емес, азаматтық қалыптасудың, ерлік пен жігердің үлкен мектебі ретінде қабылдауымыз қажет.
– Бүгінде әскери қызметшілерге мемлекет тарапынан қандай қолдаулар көрсетіледі?
– Соңғы жылдары әскери қызметтің мәртебесін арттыру бағытында мемлекет тарапынан бірқатар әлеуметтік қолдау шаралары қарастырылып келеді. Әскери борышын абыроймен өтеген жастар үшін жоғары оқу орындарына түсу кезінде белгілі бір жеңілдіктер қарастырылған.Сондай-ақ білім алу мүмкіндіктері, гранттарға қол жеткізу және басқа да әлеуметтік қолдау тетіктері бар. Бұдан бөлек, әскери қызмет атқарып жүрген азаматтарға несие төлемдерін уақытша шегеру, яғни несие каникулдарын беру мәселесі де қарастырылған. Мұндай қолдаулар жастардың әскери қызметке деген қызығушылығын арттырып, олардың болашаққа сеніммен қарауына мүмкіндік береді.
– Әскерге шақырылушылар мен олардың ата-аналары қандай мәселелер бойынша кеңес ала алады?
– Әскерге шақыру науқанына байланысты азаматтардың көкейінде түрлі сұрақтардың туындауы заңды. Мәселен, медициналық комиссиядан өту тәртібі, әскери қызметке жарамдылық мәселесі, оқуына немесе отбасы жағдайына байланысты әскери қызмет мерзімін кейінге қалдыру тәртібі жөнінде толық ақпарат алуға болады. Осы мәселелер бойынша шақырылушылар да, олардың ата-аналары да Қызылорда қаласының қорғаныс істері жөніндегі басқармасына тікелей хабарласып, қажетті кеңес ала алады. Біздің басты мақсатымыз – әрбір азаматқа заң талаптарын түсіндіру және әскери қызметке қатысты барлық мәселе бойынша нақты әрі жан-жақты ақпарат беру.
– Әскери шақыру қағазын немесе SMS-хабарлама алған азаматтарға қандай талап қойылады?
– Әскери шақыру қағазын немесе SMS-хабарлама алған азаматтар белгіленген уақытта Қызылорда қаласының қорғаныс істері жөніндегі басқармасына келуі тиіс. Бұл – заңда белгіленген талап. Шақырылушыларға барлық рәсімдер мен тексерулер заң талаптарына сәйкес жүргізіледі. Сондықтан азаматтарды шақыру хабарламасына жауапкершілікпен қарап, белгіленген уақытта келуге шақырамыз.
– Жастарға айтар кеңесіңіз бар ма?
– Отан қорғау – әрбір азамат үшін үлкен мәртебе әрі абыройлы міндет. Еліміздің тыныштығы мен қауіпсіздігі – баршамызға ортақ құндылық. Бүгінгі жас – ертеңгі ел қорғаны. Сондықтан жастарды Отан алдындағы азаматтық борышына жауапкершілікпен қарауға шақырамын. Әскер – жігіттің жігерін шыңдап, мінезін қалыптастыратын, өмірлік тәжірибе сыйлайтын үлкен мектеп. Елдің тыныштығын күзету, туған жердің қауіпсіздігін қорғау – қасиетті парыз. Отанды қорғау – тек міндет емес, ол үлкен абырой.
Түйін:Бүгінде еліміздің Қарулы Күштері қатарын толықтыру бағытындағы күзгі әскерге шақыру науқаны жалғасуда. Бұл – жастардың азаматтық жауапкершілігін айқындайтын маңызды кезең. Әскерге шақыру тәртібі және басқа да мәселелер бойынша толық ақпарат алу үшін азаматтар Қызылорда қаласының қорғаныс істері жөніндегі басқармасына жүгіне алады.
Зибаш Али