Арал аудандық көпбейінді орталық ауруханасында денсаулық сақтау саласының өкілдерінің қатысуымен «Конституциялық реформа – саяси жаңғырудың негізі» тақырыбында эксперттік талқылау өтті. Іс-шараға дәрігерлер, орта буын медицина қызметкерлері, аурухана әкімшілігі және сала мамандары қатысты.
Талқылаудың басты мақсаты – конституциялық реформаның мән-маңызын түсіндіру, оның саяси модернизациядағы рөлін денсаулық сақтау саласы тұрғысынан қарастыру және медицина қызметкерлерінің азаматтық ұстанымын күшейту. Конституциялық өзгерістер адамның негізгі құқықтары мен бостандықтарын қорғауды нығайтуға, әлеуметтік мемлекет қағидатын нақты іске асыруға бағытталған. Ал денсаулық сақтау – азаматтардың өмір сапасын айқындайтын маңызды сала болғандықтан, реформалардың бұл бағытқа ықпалы ерекше назарға алынды.
Кездесу барысында қатысушылар медициналық қызметкерлердің құқықтық қорғалуын күшейту, еңбек жағдайын жақсарту, сапалы медициналық көмекке қолжетімділікті арттыру мәселелерін көтерді. Конституциялық реформа аясында әлеуметтік құқықтарды қамтамасыз ету тетіктерін жетілдіру – саладағы түйткілдерді жүйелі түрде шешуге мүмкіндік береді. Сондай-ақ жергілікті деңгейдегі басқару тиімділігін арттыру, қоғамдық бақылау мен кері байланыс тетіктерін дамыту медициналық мекемелердің жұмыс сапасын жақсартуға ықпал ететіні айтылды.
Іс-шарада құқықтық мәдениетті арттырудың маңызы да кеңінен қозғалды. Конституциялық реформаны түсіну – әр азаматтың саналы таңдауы мен жауапкершілігін күшейтеді. Денсаулық сақтау ұйымдарында ақпараттық-түсіндіру жұмыстарын жүйелі түрде жүргізу, ұжым ішінде құқықтық сауаттылықты арттыру – реформалардың қоғамға дұрыс жеткізілуіне ықпал етеді.