Қызылорда облысында «Әділетті және прогрессивті Қазақстанның халықтық Конституциясы үшін!» өңірлік коалициясы өкілдерінің қатысуымен ақпараттық-түсіндіру жұмыстары жалғасуда. Осы мақсатта коалиция мүшелері Ақжарма ауылдық округінің тұрғындарымен кездесу өткізді.
Кездесу барысында қатысушылар алдағы референдумның маңызы, ұсынылып отырған жаңа Конституция жобасындағы өзгерістер және олардың ел дамуына ықпалы туралы ақпарат алды.
Басқосуға коалиция өкілдері Гүлшат Мұсаева, Абайбек Жүнісов, Нұрлан Әмір, Дәурен Сейтжанов, Арайлым Байжігіт, Әліби Басаров және Берік Шайнұров қатысты.
Жиында сөз сөйлеген қалалық коалиция жетекшісінің орынбасары, облыстық мәслихат депутаты Гүлшат Мұсаева қазіргі кезеңде мемлекеттік басқарудың маңызды қағидаттарының бірі – адамға бағдарланған мемлекет қалыптастыру екенін атап өтті. Оның айтуынша, жаңа Конституция жобасында адамның қадір-қасиеті, құқықтары мен бостандықтары мемлекет қызметінің басты бағыты ретінде айқындалған.
Ал коалиция мүшесі, Исатай Әбдікәрімов атындағы Қызылорда политехникалық жоғары колледжінің директоры Абайбек Жүнісов құжатта ауылдық аумақтарды дамыту мәселесіне де ерекше көңіл бөлінгенін айтты. Оның сөзінше, ауыл шаруашылығын дамыту, инфрақұрылымды жетілдіру және ауыл тұрғындарының әлеуметтік жағдайын жақсарту бағыттары негізгі басымдықтардың қатарында қарастырылған.
Кездесу барысында білім беру, медицина және әлеуметтік қызметтердің қолжетімділігін арттыру мәселелері де талқыланды. Бұл бағыттар ауыл мен қала арасындағы әлеуметтік-экономикалық айырмашылықты азайтып, өңірлердің теңгерімді дамуына ықпал ететіні айтылды.
Сонымен қатар аграрлық секторды қолдауға арналған жаңа құқықтық тетіктер енгізу мәселесі қозғалып, олардың ауыл шаруашылығы саласының тұрақты дамуына жағдай жасауға бағытталғаны атап өтілді.
Өз кезегінде коалиция өкілдері Нұрлан Әмір, Арайлым Байжігіт, Дәурен Сейтжанов және Әліби Басаров жаңа Конституция жобасы қоғамның түрлі топтарының мүдделерін ескере отырып әзірленгенін айтты.
Кездесу соңында тұрғындар өз пікірлерін білдіріп, қойылған сұрақтарға жауап алды.